හෙළුවෙන් යාමට ඔට්ටු ඇල්ලූවෙම් .

" ඕං පේනවා නේද මහත්තයෝ අපේ ලොක්කොන්ගෙ වැඩ " 

                           කටපිරෙන්න තිබුන බුලත් කෙල සේරෝම ටික, අල්ලපු වත්තේ උන් බොහොම අමාරුවෙං වවාගෙන තියෙන ගොටුකොල යායට වැටෙන විදිහට කෙලගහන ගමන් සයිට් එකේ වම් පැත්තේ කොනකට වෙන්න ලෑලි ගහලා හදලා තිබුන ටකරං වාඩියට , ප්‍රේමදාස මාමා , එහෙම කියාගෙන ගොඩවුනේ මං සජිතයත් එක්ක වාඩියේ කොනකට වෙලා කවුදෝ මන්දා උදේ පාන්දර ගෙනත් තිබුන කැවුම් මල්ලෙන් ගත්තු මුං ඇට කැවමක් එක්ක උණු ප්ලේන්ටියක් ගහන අතරෙයි.

" ඇයි බං අයියේ !!! මොනවෙයි වෙලා තියෙන්නේ "

                 තඩි වලහෙක් මීවදයක් කනවා වගේ අත් දෙකෙන්ම කැවුම් දෙකක් අල්ලගෙන කට පුරා කැවුම් පුරවගෙන  දුම් දාන ප්ලේන්ට්ය දිහා බලාගෙන හිටපු රසිකයා එහෙම අහද්දි , මාත් ඒ පැත්තට ඇන්ටනා පාර දැම්මේ මේවගේ තේවෙලාවකදි සයිට් එකේ උන්ගෙ කටිං කියවෙන එව්වා සතියක් විතර මතක්කර කර හිනාවෙන්න පුළුවන් බව තක්කෙටම විස්වාස නිසා .

" කොහෙද ඉතිං උඹලා මේ ලිඳ ඇතුලෙම ඉන්නවා මිසක් රටේ ලෝකෙ වෙන දෙයක් දන්නව කියලයෑ . රටට ගේට්ටුවෙන් එලියෙ කොටි ගැහුවත් උඹලා දන්නේ නෑ !  අන්න බලාපං අද පත්තරේ තියෙනවා අයෙමත් පාරක් දුමින්ද සිල්වා පාර්ලිමේන්තුවට එනවා කියලා. "

" හප්පට සිලිං කිව්වලු "  රසිකයා එහෙම කිව්වෙ කටේ පුරවං හිටපු කැවුම් සේරම ටික උගෙම තේ එකට වැටෙන්න විදිහට කට ඇරලා .
                                                       කට අස්සෙ තිබුන කැවුං හපේ දැකලා ඒ ඉස්සරහිංම බිම ඇන තියාගෙන උන් මාරිස් අප්පු , කොට ටකරං බිත්තියෙන් එලියට කෙල ගහැවේ අතට ගත්තු කැවුම ආයෙම බෑග් එකට දාන ගමන් .

වටේටම ඇන්ටනාව දාන ගමන් මං සජිතයා දිහා බලලා හිනා වෙලා තවත් කැවුමක් අතට ගත්තා .

" වෙන්න බෑ , ඌව අයෙ ගනීද මාමේ රට කොරන තැනට " සෙට් එකේ  හිටපු බාලම කොල්ලා එහෙම කිව්වේ උනු ප්ලේන්ටි උගුරක් බඩට යවාගන්න ගමන්

" උඹ දන්න බම්බුව , පත්තරවල ඉන්න මිනිස්සු බොරු කියාවිද . අනික ඒක තිබුනේ තඩි අකුරිං මුලපිටුවෙමයි ." 

" අම්මාපල්ලා මුංටත් අමු කැවිලද කොහෙද නැතං අයෙ පාරක් මේ හාල්පාළුවාව ගනීවිය " මෙච්චර වෙලා කට වහාගෙන හිටපු අන්දිරිස් මාමත් කථාවට එකතු වුනේ සජිත්ගේ මූණ දිහා බලාගෙන කැවුමක් අතට ගන්න ගමන්. 

" ඕකනං මොකද්ද බං  දැන් ඉන්න සේරම එව්වෝ හොරුයි , මංකොල්ල කාරයොයි ,  ස්ත්‍රී දූශකයොයි , මිනීමරුවොයිනේ ඔය ගොඩට තව එකෙක් එකතු වුනා කියලා මහා වෙනසක් වෙන්නේ නෑ " ආයම පාරක් මැදින් දුන්නේ රසිකයා . මේ පාරනං ප්‍රේමදාස මාමා ඌ දිහා බැලුවෙ බොහොම දරුණු විදිහට.

" ඔවු ඉතිං උඹලා චන්දෙ දීපු එවුන්නේ "

" බම්බුව "

" ආහ් ......... මහත්තයා කියන්ට බලන්ට ඒ කරපු වැඩේ හරිද නැද්ද " ප්‍රේමදාස මාම ඒ විදිහට කියලා මගේ දිහා බැලුවේ අන්තිම කැවුං කෑල්ලත් හපාගෙන ප්ලේන්ටියට කට තියන්න යද්දිමයි . 
                                  එකපාරට ආපු කැස්සත් එක්ක දුඹුරු පාට කහට කෝප්පෙකං කාලක් විතර සුදු ශර්ට් එක දිගේ ගලාගෙන ගියා. වාඩියේ උන්න හැම එකාම මගෙ දිහා බලාගෙන හිටියේ අළුතෙන් සත්තු වත්තට ගෙනත් දාපු ගෝරිල්ලෙක් දිහා බලාගෙන ඉන්න විදිහට.
                                      මාත් , ඔන්න ඔහේ ඕනේ රෙද්දක් කියලා ප්ලේන්ට් උගුරක් පහලට බැස්සුවෙ මොන වගේ උත්තරයක් දෙන්නද කියලා හිතන ගමන් .
                             සයිට් එකේ වැඩ කරන උන්ට වෙනමයි , වැඩ බලන අපිට වෙනමයි තේ හදන්නේ ඇයි කියලා තේරුනේ මේ වෙලාවේ . ඒත් දැං පරක්කු වැඩී  මායි සජිතයයි මේ රිංගගෙන ඉන්නෙ අපිට තේ හදන වාඩියට නෙවෙයි. කැවුමට පෙරේතකමේ පොඩි උන්ගෙ වාඩිට .

" මං නං කියන්නේ ඒකේ ඒ තරං අවුලක් නෑ මාමේ "  තවත්  ප්ලෙන්ටි උගුර සනීපෙට පහලට බහිද්දි මං කිව්වේ ඇඟටපතට නොදැනෙන විදිහට.

                                අඩුසීනි කහට එකක් බබී හිටපු ප්‍රේමදාස මාමාගෙ තේඑක උගුරෙ හිරවෙන්න වැඩිවෙලාවක් ගියෙ නෑ , කැවුං මල්ල බදු ඇරං හිටපු රසිකයගෙ අතිං ඒක අන්දිරිස් අප්පොගෙ තේ කෝප්පෙ උඩට  අතඇරුනේ වොට් තිස් තුන්දාහක් වැදුනා ව‍ගේ ගැස්සිලා . විසික්වෙලා ගියපු කහට වලින් නාගත්තු පූස් තඩියෙක් වාඩිය ඇතුලෙ ඉදං එලියට ලිඳ පැත්තට දුවගෙන ගියා . හෙට ලිඳ ඉහින්න වෙයිද දන්නේනෑ !

"  මහත්තයලා මොනවද දන්නේ දේශපාලනේ ගැන . මේ ඊයෙ පෙරේදා ඉස්කෝලෙන් පිටවුන කොල්ලෝ " ප්‍රේමදාස මාමා මගෙන් බලාපොරොත්තු වුනේ මිනිහගේ කථාවට මාත් හූ මිටි තියයි කියලා .

"  එහෙම කියන්ට බෑනේ ප්‍රේමදාස අයියේ  දැං ඔය වැඩිපුරම දේශපාලනේ වෙන්නේ රජයේ විස්ස විද්‍යාල වලනේ "  රසිකයා  කැවුං මල්ල පැත්තකින් තියලා මගේ පැත්තට  අඩේ තිබ්බේ  ඌ මුල ඉඳලම අනිත් පැත්තට ටෝක දීගෙන හිටපු නිසා වෙන්න ඇති .

"  අනේ ඔය චූ කොල්ලංගෙ දේශපාලනේ " අන්තිම තේ උගුරත් බඩට දාගෙන කෝප්පෙ හෝදන්න හිතාගෙන නැගිටින ගමන් 

ඒ පාරනං මටත් නහුතෙටම මල පැන්න .ඇය් යකෝ මේ පැත්තනට වෙලා හිටපු මාව මොකද්දෝ  අහකයන වස්තරේකට අල්ලගෙන චූ කොල්ලා කියන්නේ . අර ඇමති උන්නාන්සෙගෙ පුතාටනං එහෙම කිව්වත් කමක් නෑ .
කටට ආවට ඔහෙ කිව්වා මිසක් කියපු දේ සාධාරණයි කියලා කියන්න හේතුවක් නැතුව ඔළුවෙ හැම අස්සක් මුල්ලක්ම පීරනකොට තමයි මට ඒක මතක් උනේ . ඔවු ....... සිරකරුවෝ මනුශ්්‍යයෝය.

"  ලෝකෙ තියෙන හැම දේම වෙනස් වෙනවා කියලා බුදු හාමුදුරුවොත් කිව්වනේ  , ඉතිං ඇයි දුමින්ද සිල්වට වෙනස් වෙන්න බැයි ද ? ඒ මනුස්සයා දැං සෙමින් දැහැමින් පාලයන කරගෙන යයි " 

"  අන්න හරි මහත්තයෝ . අංගුලිමාල මිනී කීයක් මරලද අන්තිමට රහත් උනේ , ඒ මනුස්සයත් දැං වෙනස් වෙලා ඇති ."  අන්දිරිස් අප්පොත් මගේ පැත්තට මුක්කුව ගැහුවා .
                                මාව ඔකඳ වෙලා හිටියට මොකද , මෙච්චර වෙලා තමංගෙ මතේට හූමිටි තිබ්බ උන් හෙමීට පැත්ත ගහද්දි ප්‍රේමදාස ගොයියට ඉහුලුං නැතුව ගියා . මගේ පඬිටොක් එක නිසා වාඩියේ උන්න සේර උං ප්‍රේමදාස මාමා දිහා බැලුවේ කොචොක් එකට වගේ .

"  ඇත්ත ඇත්ත මහත්තයෝ අනික දැං මිනිහට කලිං වෙච්ච දේවල් මතකත් නෑනේ !!! " රසිකය එහෙම කිව්වේ හැම එකාටම කැවුං හිරවෙන්න හිනාවකුත් එකතු කරනගමන් ,ඒත් ප්‍රේමදාස මාමා නෙවෙයි හිනා උනේ.

"  එහෙම උනේ නෑ බොලව් මේක පොරජාතත්ත්‍රවාදී රටක් "  

"  මොකක් යකෝ ඒ කිව්ව කුණුහබ්බෙ " 

"  ඔය පේනවනේ, ඒව වත් දන්නෙ නැති උන් තමයි මෙතන හූමිටි තියන්නේ .ඔය හිරේ ගියපු උන් එලියට ඇවිල්ලත් කරන්නේ ඒ ජරාවැඩේම තමා . හැත්ත!!!!! තොපිට ඒක තේරෙන්නේ නෑ " 

ප්‍රේමදාස මාමාට නහුතෙටම මලපැනල ඉන්නේ . අනේ මටනං කැවුමක් තරං වත් ගානක් නෑ . 

"  එහෙම නෙවෙයිනේ , දැං බලන්ට මාමේ  විජය කුමාතුංග හිරේ ගියා , මැතිනිට ප්‍රජාඅයිතිය නැති උනා , සරත් පොන්සේකා ත් හිරේ ගියානේ  අද රටේ ඉන්න උසස් අධ්‍යාපන ඇමතිත් එකපාරක් කට තියාගන්න බැරුව හිරේ ගියානේ . දැං ඔය එලියට ඇවිත් ඉන්නේ යස අගේට " 
                                                    මං එහෙම කියවගෙන යද්දි ප්‍රේමදාස මාමට කට උත්තර නෑ . කථාව ඉවර උනත් හරි රසිකයයි අන්දිරිස් අප්පොයි දෙන්නා අප්පුඩියකුත් ගැහුවා .

"  ඒ ඉස්සරනේ බොලව් දැං එහෙම උන් නෑ !!! මොකෝ කියන්නේ මහත්තයා . මං ඕනේ ඔට්ටුවක් අල්ලන්න ලෑස්තී ඔය හොරා මේ අවුරුද්ද ඉවර වෙන්න කලිං ආයෙම මොකක් හරි මගෝඩි වැඩකට මාට්ටු වෙලා පෙරෙවූත්ති වල පෙන්නනවා "  .  මගෙ මුලු ඇඟම සීතල වෙලා ගියා . ඔට්ටුවක් !!!!! හත් ඉලව්වේ  දීපු ටෝක්වල හැටියට ඔට්ටුව බාර ගත්තෙ නැත්තං !!!!!  ඊට හොඳයි ඇඳුං නැතුව සයිට් එකට එනවා .

"  අන්න හරි  මාමේ මේ අවුරුද්ද ඇතුලත උන්දා මොකතට හරි මාට්ටු උනේ නැත්තං  මාමා සරම නැතුව සයිට් එක වටේ චූකර කර දුවන්ට ඔනේ !!!!මොකද කියන්නේ ."  මගේ ඉහිං කනිං දාඩිය බේරෙද්දි මෙච්චර වෙලා කටවහගෙන මගේ ගාව ඉඳගෙන හිටිය සජිතයාත් උ‍ගෙ කටේ බලේ පෙන්නුවා . 
"  තොට මෝල්ද යකෝ "  මං උගෙ කනට කරලා එහෙම ඇහුවේ ඔට්ටුව පැරදුනොත් ඌ මට මොනව  කරන්න කියයිද දන්නේ නැති නිසා .

ඔය අල්ලපනල්ලෙම තමයි සයිට් එකේ ඉන්න ලොකුම ඉන්ජාත් මඩුවට ගොඩ උනේ . වසලා හමාරයි .

"  ඕක මොකද්ද !!!! ඇඳුං නැතුව යනවා විතරක් නෙවෙයි මං වැලිගොඩේ පෙරලෙනවා බොලව් "  ප්‍රේමදාස මාමා ඔට්ටුව භාර ගත්තා .

"  හැබැයි අයියේ උඹ පැරදිලා හැංගිලා ඉන්න නං බෑ ඕං හොයාගෙන ගමට ඇවිල්ලා ඇඳුං ගලවන්නේ බලාගං " 

අපි එහෙම බයේ ඉන්න උන්ද බොලව් .එහෙම කියපු ප්‍රේමදාස මාමා කාරලා කෙල පාරක් ගහලා අයෙම කැවුමක් හපන්න ගත්තා .

"  හරි දැං මං ඔට්ටුව පැරදුනොත් !!! "   මං  මෙච්චර වෙලා හිතේ තෙරපි තෙරපි තිබුන  ප්‍රශනේ එලියට ඇදලා දැම්මා .

"  එහෙම උනොත් ඉතිං වෙන මොනවා කරනනද !!!!  මහත්තයා කලිසම ගලවගෙන වැඩපොල වටේ ඇවිදින්න ඕනේ "  හුටා !!!! 

"  වැඩපොලේ විතරක් නෙවෙයි ඌ  හෙඩ් ඔෆිස් එකේත් ඇවිදී දිනෙල්කයා. ඒ ගැන බය වෙන්න එපා ."  සජිතයා මොන රෙද්දක් කරනවද මන්දා සයිට් එකේ නං ඉන්නේ පිරිමි විතරයි ඒත් හෙඩ් ඕෆිස් එකේ කෙල්ලොත් ඉන්නවා යකෝ . තෝ මැරියං  මේ කරපු බලු වැඩේට.

"  හරි එහෙනං ඔට්ටුව පැරදුනොත් මහත්තයා සයිට් එකේ නෙවෙයි ඔපීසියේ ඇවිදින්න ඔනේ කලිසම නැතුව  ඕන්න ඔට්ටුව හරි මෙතන සේරම සාක්කි . "  මහ ඉන්ජා එහෙම කිව්වේ  මගෙ දිහා බලාගෙන නක්කලේට හිනා වෙන ගමන් . සජිතයත් ඒ හිනාවටම එකතුවුනා .

"  පුතා බයද? " මහ ඉන්ජා ආයම මගේ දිහා බැලුවා . 
                                         වාද පිටියකට ගිහින් දෙතුන් සීයක් එක්ක වාද කරන්න මං බය නෑ . තනිංයෙං ඉද්දි විසි තිස්දෙනක් එක්ක ගහගන්නත් බය නෑ ( එච්චර උන් හිටියොත් ගුටි කන එක වෙනම කථාවක් ) එහෙව් එකේ  ඇඳුං නැතුව හෙඩ් ඔෆිස් එකේ ඇවිදින එකට මං බයවෙයිද  !!!! ඔවු........... එකටනං මං ගූ බයයි . 

දැං ඉතිං පස්ස ගහන්න බෑ ...... එහෙම කලොත් වස නෝන්ඩිය . 
"  හරි එහෙනං අපි බලමු  කෝ මොනවද වෙන්නේ කියලා. " 

                                 වෙනදවස් වලටත් වැඩියෙන්ම මම එන්නේ මේ පොඩි උන්ගේ වාඩියට වෙලා උන් එක්ක තේ එක බොන්න . ලොකු උන් එක්ක වෙනම තේඑක බීලා පොඩි උන් එක්ක වැඩ කරනවට වඩා මේ විදිහට උන් එක්කම තේඑක බොන්න එන එකෙන් උන් එක්ක මගේ තිබුන හිතවක් කම වැඩි උනා වගේම මං  කියන වැඩ ටිකත් නෑ බෑ කියලා කියන්නේ නැතුව කරන්න උන්ව කැමති කරගන්න මට පුලුවන් උනා . 
                             අද වාඩියෙන් එලියට යන්නේ මේ අවුරුද්ද ඇතුලත ඔනේම දවසක ඇඳුං ගලවන්න ලෑස්තිපිටයි.මුලිං මුලිං අවුලක් තිබුනට දැන් නං  ඒ ගැන කිසිම බයක් නෑ .මොන මගෝඩි වැඩක් කලත් දුමින්ද උන්නාස්සේ මේ අවුරුද්ද ඇතුලෙ නං එහෙම එකක් නොකරද බව ඉරහඳ වගේ විස්වාසයි . ඔට්ටුව දැම්මයි කියලා , වාදයක් ගියයි කියලා මං මුං එක්ක තරහ වෙන‍්නෙත් නෑ උං මගෙත් එක්ක තරහ වෙන්නෙත් නෑ කියලා මට හෙට ඉරපායන්න කලිං මං කක්කුස්සි යනවා කියන එකටත් වඩා විස්වාසයි .
                             අනේ ඉතිං ජනවාරි පලවෙනිදා ඇඳුං නැතුව සයිට් එකේ ඇවිදින ප්‍රේමදාස අංකල්ව මට මැවිලා පේනවා .  හිතවත්කම වැඩිවෙද්දි මේවගේ ඒවා වෙනවා . ඒත බං ........... මං හෙට තේ එක බොන්නෙත් මෙතනිංම තමයි 

- දිනෙල්ක -

පහුගිය දවස්වල දාපු පෝස්ට් වල මගේ සුපුරුදු ශෛලිය නැතිවෙලා තියෙන්න ඇති . වෙන විදිහකට ලියන්න පුලුවංද කියලයි අතහදා බැලුවේ . ඒ උනාට මගේ විදිහ මට හොඳයි කියලා තේරුනා . ආය් වෙන විදි නෑ ඔං ආයුබෝවං . අයෙත් පාරක් විලක්කුව විලක්කුවම වෙයි .

මැදියම් රැයේ හමුවූ බෝදිලිමා ( සාමාන්‍යයෙන් ඔබ්බට ගිය සත්‍ය කථාව )

එදා පරිසරය 

 පළවෙනි කොටසට මෙතනින්

මැදියම් රැයේ හමුවූ බෝදිලමා ( සාමන්‍යයෙන් ඔබ්බට ගිය සිදුවීම් දාමය )

                                 

             පට්ටිපොළට හිරු බැස යන්නේ එතෙක් පැවතියාවූ සොඳුරු පරිසරය මුලුමුනින්ම වෙනස් කරමිනි .සොඳුරු දසුන් එකවනම මිහිදුමත් සමඟ ගලා එන්නාවූ අඳුරින් වැසීයයි .
                                  මධ්‍යාහනට පසු එකවනම රාත්‍රිය උදාවීම පට්ටිපොල ප්‍රදේශයට වසරේ එක කාර්තුවදී මුහුණදීමට සිදුවන්නාවූ ස්වාභාවික සිද්ධීයකි . අප කඳවුරු බැඳි ඒ මාසයද , පෙරකී කාර්තුවට අයත්වූවකි . පට්ටිපොල පතනයේ ලඳුකැලෑ අතරින් මිනිස් ඇසින් වෙන්වී ගිය සො‍ඳුරු දිය ඇල්ලක් සොයා යන ගමනක අපි නිරතවී සිටියෙමු . දින දෙකක් ගතකොට දිය ඇල්ලවෙත ලඟාවීමටද අනතුරුව එලඹෙන දින දෙක යලි පැමිනීමටද යොදාගත් අතිවෙහෙසකර ව්‍යායමයක දෙවන දිනයේ දිය ඇල්ල අද්දර කඳවුරු බැඳගැනීමට අපට හැකිවිය .
                                                      ආවේනික සර්පයින් කීපදෙනෙක් හමුවීම හැරුනුකොට මේ දින දෙක තුල අපට මුහුණදීමට සිදුවූ කිසිදු ජීවිතාවදානමක් හෝ අණතුරක භීතියක් නොවීය . 
                                              නමුත් දැන් අප මේ මුහුණදී සිටින්නේ කුමන ආකාරයේ අවදානමකටද !!  සියළුදෙනාම භීතියෙන් තැතිගෙන සිටී . කූඩාරම තුල එල්වූ ලන්තෑරුමේ මන්දාලොකයෙන් හා කඳවුර ඉදිරියේ දැල්වෙන ගිණිමැලයේ ආලෝකයෙන් මා දුටුවේ අප මඟපෙන්වන්නන් පවා භීතියෙන් තැතිගෙන සිටින ආකාරයයි . ඔවුන් අපගේ බලවත් ඉල්ලීම මත දින හතරක මේ ගමන සඳහා සහභාගී වු අහිංසක ගැමියන්ය . 
                                     අඳුර හා මීදුම විනිවිද යමින් ඇසෙන්නේ කාගේ කුමන හඬද යන්න මාගේ මනසේ විදුලි කෙටීමට  ගතවන්නට ඇත්තේ තත්පර කිහිපයකි . මින් පෙර එකවරක් පමනක් අසා ඇති ඒ භීතියේ හඬ, යලි කිසිදා නොසන්නට පැතූ ඒ මුසල හඬ යලිත් ඇසෙන්නට වීම අනෙකුන්ට වඩා මා සිත සලිත කලේ . සොඳරිගෙන් දෙවන වරමක්  ලැබීම සිදුවන දෙයක් නොවන බව කලකට පෙර වෙද සීයා පැවසූ වදන මනසේ හොල්මන් කරන්නට වීම නිසාය . 
                                        බඩදරු අම්මා‍ කෙනෙක් විලිරුදාවෙන් නඟන හඩට නොව , සොඳරි ගේ හඬ සමාන වන්නේ විලිරුදාවෙන් මියෙන්නට දඟලන කාන්තාවකගේ හෝ පාපතරයෙකු විසින් ගෙල හිරකිරීම නිසා වේදනාවෙන් කෑගසන කාන්තාවකගේ හඬටය . සියළුම සංවේදී ඉන්ද්‍රියන් හිරිවැටෙන ආකාරයෙන්  සිදුවෙමින් පවතින මුර ගෑම හමුවේ විනාඩි කීපයකට පෙර පැවති නිසල විනෝදාස්වාදය පලාගොස් ඇත . කඳවුරු බිමේ පිරිමින්ම සත්දෙනෙකි . 
                     නමුත් ප්‍රතිමල්ලවයා මිනිසෙකු නොවේ !!!! ‍ කිසිවෙකු නොදුටු අමනුස්සයෙකි , නැත්නම් දුටු අයවලුන් සිහිවිකල් කලාවූ සත්වයෙකි . අපි කෙසේ නම් මීට මුහුණ දෙමුද !!!
                                  මයිලක් පමණ ඈතින් ඇසුන වේදනාකාරී හඬ ලං වෙමින් පවතී .බෝදිලිමා පහර දෙන්නේ එලෙ‍සින්ය . ඔය ඇසෙන්නේ අණතුරු ඇඟවීම විය යුතුය . සිංහල සේනාව එනවිට වැයෙන රණ බෙර ඇසුන පෘතුගීසින්වත් මේ තරම් අසරණ නෙවෙන්නට ඇත . 
                    අප කිසිවෙකුටත් කථා කරගත නොහැකි තත්වයකට පත්වී ඇති සෙයකි . ගිණිමැලයේ ආලෝකයෙන් දිලෙන ,  මීටර් දහයක් පමණ ඈතින් ඇති ලඳු කැලෑවේ ආරම්භය දෙස සියල්ලෝම නෙත් යොමා සිටින්නේ කොයි මොහොතක හෝ  පඳරු අතරින් එලියට ඇදෙන අපේ මරණය බලාපොරොත්තුවෙන්ද !!!
                                        මරණ භය , මිනිසෙකුට දැනෙන්නේ ජීවිතයේ අවස්ථා කීපයකදී පමණක් විය හැක . නැත්නම්  අවසන් මොහොත තෙක් දැනෙන්නේ නැත. නමුත් අප මේ මුහුණ දී සිටින්නේ පිරිමින් සත් දෙනෙකුට මරණ භය දැනෙන මොහොතකටයි . ඒ දැනෙන්නෙත් උපරිමයට බව ඉර හඳ මෙන් විස්වාසය. අවට සිටින මා මිතුරන්ගේ මුහුණු ඇකිලී ඇත්තේත් ,ඔවුන් බලාගත්වනම බලාසිටින්නේත් ඇයි දැයි කියා සිතාගැනීමට නොහැක. හිස කරකවා වටපිට බලන්නේ මා පමණද !!! 
                       " සංජීව " මා අසලින්ම සිටි මිතුරා දෙස බලා  ආමන්ත්‍රනය කලද ඔහු‍‍ගෙන් කිසිදු ප්‍රතිචාරයක් නොවීම පුදුමයක් සේම මා සිත්හී ඇතිවුන භීතිය දෙගුන කිරීමටද හේතුවක් විය . 
                             " සම්පත් , රජී , අඩෝව් කථා කරපං යකෝ  මොනව හරි කරමු ගනිං ඔය ‍ගිණිපෙල්ලක් අතට ...... මොකෙක් හරි සතෙක් වෙන්න ඇති "
එසේ කලේ හිත රවටා ගැනීමටය . තව මොහොතකින් මා මීට වසර පහලොවකට පෙර දුටු අප්‍රසන්න දසුන දකින්නට වෙන බව හොඳාකාරවම දනිමි .
                                මා ඇමතුවේ අනිත් මිතුරන්ටය . නමුත්  ඔවුන් නිසලය ........... වශීවී ඇති ආකාරයකින් ඔවුන් බලාගත් අතම බලාසිටී . කරන්නට දෙයක් නැතිකමින් සම්පත්ගේ උරහිසට තද පහරක් එල්ලකලේ ඔහුව නිද්‍රාවෙන් ගලවා ගැනීමටය . නමුත් අසාර්ථකය. 
                                  පඳුරු තැලෙන හඩු ඇසෙයි . අවදිව ඇත්තේ මා පමනි ........ තවත්  සුලුමොහොතකි ....... වසර පහලොවකට පෙරදුටු අප්‍රසන්න රුව හොඳින් ගිණී එලිය නොඑන මුල්ලක පෙරලෙමින් දඟලනු පෙනින. මිතුරන් වශිවී හෝ භීතිය නිසා ගල්ගැසී ඇත . මා පමණක් මේ අමනුස්ස ග්‍රහණයට නතුනොවුයේ ඇයි .
                                                 දහනවය කන්ද මුදුනේදී මහසෝනා මුණගැහුනු ආකාරයත් ගැලවුන ආකාරයත් තත්පර කීපයක කාලයකදී විදුලි කෙටුවාක්මෙන් සිහිවිය . අමනුශය ග්‍රහනයට මා නතුනොවන්නේ උපන් වෙලාව හා ගණය නිසා බව වෙද සීයා පැවසූ ආකාරයද ඒ සමගම සිහිවුන නමුත් මෙහිදී මා කලයුත්තේ කුමක්ද  .
                                            මනස වසර පහලොවක් අතීතයට යන්නට ගතවූයේ සුලුමොහොතකි . එදා බෝදිලිමා අපේ මිදුලේ දර්ශනය වූ විට වෙද සීයා මැතුරුවේ කුමක්ද !!!
" ඒ සතා ආව වෙලාවේ මොනවද සීයේ කිව්වේ ඒ "
" ඒක බොහොම බගතු මන්තරයක් පුතේ "
" මටත් කියලා දෙන්නකෝ "
" තව ලොකු වෙද්දි පුලුවං වෙයි නිකම්ම , දහම්පාසලට යද්දි උගන්නනවා "
" මන්තර උගන්නවයැ දහම්පාසලේ "
" මේක මන්තරයක්ම නෙවෙයි , ආරක්ශක පිරිතක් පුතේ රතන සූත්‍රය......"

                              ඔවු රතන සූත්‍රය ........ එකල එම සූත්‍රය නොදැන සිටියත් පසු කාලීන දහම් අද්‍යාපනය සමග එය සෙල් ලිපියක් සේ මනසේ තැම්පත්වී තිබිනි . සැලෙමින් වේදනා දෙමින් ඳඟලමින් කෑගසන ගුලිය දෙස බලාගෙන රතන සූත්‍රය තොල් මැතිරෙන්නට ගත්තේ  සිතාමතා නොවේ .....
                                    මෙතෙක් වෙලා සෙමෙන් ඉදිරියට එමින් තිබූ ගුලිය නැවතුන අතර ආපස්සට පෙරලී යන්නට විය පඳුරු අතරින් එය අතුරුදන්වීමටත් වේදනා කාරී හඬ නැවතීමටත් ගත්වූයේ සුලුමොහොතකි . පසුව සියල්ල අඳුරුවිය.
පසුදා අළුයම හිරු කිරන දිය ඇල්ලේ මුදුන සිප ගනිද්දී අප ආපසු ගමනට සූදානම් විය.
                                පෙරදා රාත්‍රියේ සිදුවීම ගැන කථා කලද සිදුවූයේ මොනවාද කලේ මොනවාද යන්න ගැන කිසිවෙකුටත් නිවැරදි මතකයක් නොවීය . රතන සූත්‍රය මැතිරීම හා ගිරිය යටින් මොර දෙන හඩ හැරුනුකොට මටත් කිසිවක් ගැන නිවැරදි මතකයක් නෙවුන නමුත් කළු පැහැති අප්‍රසන්න ගුලි ගැසුන සත්වයා හා ඌ සූත්‍රයකට බියවී පලාගිය අයුරු මනසේ තැම්පත්වී තිබිනි. 
සමහර විට තෙවනි වරයක් සොඳරිගෙන් මට නොලැබෙනු ඇත !!!!


‍ප/ලි - මේ ලියන්නේ විද්‍යාත්මක බණ දෙසන්නට එන අයටය , මේ සිදුවීම විද්‍යාත්මකව පැහැදිලි කිරීමට නම් එයට මුහුන දිය යුතුය . බෝදිලිමා කටුස්සෙකු හෝ වෙනත් සතෙකු විය හැකි බවට මත ඇත . බෝදිලි කටුස්සා නමින් කටුසු වර්ගයක් සිටින බව සියල්ලෝම දන්නා කරුණකි .   එය සත්‍යකි  නමුත් එම කටුස්සාට මෙවන් ශබ්ධයක් පිට කල හැකිද ? එසේම , සුත්‍රයකට බියවී පලා යන්නේ මන්ද ? 
 උත්තර නැත !!! මටත් එලෙසමට .


-දිනෙල්ක-

මායා ජාල් ( මන්තර කියන්නේ ඇත්තක්ද !!! කරලාම බලන්නකෝ )

                            බොදිලිමගේ කථාවේ අන්තිම කොටස දෙන්න කලිං වෙන මොනව හරි කරලා ඉම්මුද .....
ඔන්න වෙනස් වැඩක් හරිද මචංලා ..... මේවා අත්හදා බලලා කෙල උනාට පස්සේ මාව හොයාගෙන ආවයි කියලා මහ ලොකු ප්‍රතිකර්ම නං කරන්න දන්නේ නෑ ඕං.....

සීයාගේ මන්තර පොත් වලින් උස්සන ලදී ..... අව භාවිතයෙන් ලැබෙන ප්‍රතිථල ගැන වග නොකියන අතර ..... මස් මාංශ හා වෙනත් ආකාරයක කිල්ලකට අසුවීමෙන් පසු බාවිතා කිරීම නිසා ඇතිවන ගැටලු ගැනත් වග නොකියනු ලැබේ ......

මුලින්ම ඉතිං වටින කියන එකක් දීලා ඉමුකො නේද !!!

වශී මන්තර -

මුහුණ බලා වශී කරගැනීම -

නමෝ මුඛ බන්ධ මෝක්ශ මුඛ බන්ධ හැස්වාහ් 

ස්ත්‍රියගේ  / පුර්ශයාගේ මුහුණ බලා මේ මන්තරය කීප වරක් සිහිකරන්න ..
ස්පර්ශයෙන් වශී කිරීම - 

ඕං ඊ තාස් ප්‍රෙතේස් කාල සරුව ස ශාරි මුඛ මෝහිනී එයිප්පෝලේ රාක්ෂ ආයු වල දේවී තෝ අඩා නාභ ජීවික රාක්ෂත්තු කුරු කුරු එහි ඒස්වාහ

ඉහත මන්ත්‍රය  පිරිසිදු තල තෙල්  වලට මතුරා එම තෙල් බිඳක් කෙස් ගසකින් ගෙන දකුණු අතේ වෙඳගිල්ලේ ගාගෙන ගොස් වශී කිරීමට අවැසි අයගේ වමතින් අල්ලන්න .

ආරක්ශාවට මන්තරයක් - 

ඕං ශ‍්‍රීං සංකාර ව්‍යාඝ‍්‍ර හස්ත මුද්‍ර ගිණි දරණ නම: ඕං ගජ සංහාර ශ‍්‍රී

මුණියාණේ ව්‍යාඝ‍්‍ර ස්ථුල ජල රුද්‍ර ගජදේව මුද්‍ර ව්‍යාඝ‍්‍ර ගිණි දරණ නම: ඕං 

අෂ්ට ගුරු ගජේන්ද්‍ර විප‍්‍ර මණ්ඩල චිත්ත සංහාර ව්‍යාඝ‍්‍ර මුචලින්ද ගිණි දරණ 

නම: ඕං නෛයේරුම් වෛරික්කොණ්ඩුම් ගජ සිංහ ව්‍යාඝ‍්‍ර පංචේන්ද්‍ර මුද්‍ර 

සංකාර නම: ඕං අග‍්‍ර ශ‍්‍රී බ‍්‍රහ්ම චන්ද්‍ර වර භද්‍ර ගණ ගජේන්ද්‍ර ත‍්‍රිභුවනා ෙ

රෙර ගිණි දරණ ව්‍යාඝ‍්‍ර ගිණි දරණ නම: ඕං ගණකඩ දරණ ගිනි දරණ 

ආකාශ දරණ ව්‍යාඝ‍්‍ර මුද්‍ර දේව ගිණි මුද්‍ර ගිණි නම: ඕං දේව ගිණි ව්‍යාඝ‍්‍ර 

මුද්දෙන් අහස ගිණි කළෙමි. පංච්න්ද්‍ර ව්‍යාග‍්‍ර මුද්දෙන් පොලොව ගිණි 

කළෙමි. වෙසමුනි නයනාවුධ මුද්දෙන් සක්වල ගිණි කළෙමි. මා දුටු 

යකුන් යක්‍ෂණියන් ගේ ඇඟ සළිත, ඇස සළිත, ඉස සළිත, ගණකඩ 

පතාකයා නමෙන් යක්‍ෂයා තාගේ ඇට ගත කුළල් ගත සන්ධිගත නහර 

ගත සියොළඟ වෙළි වෙළී ව්‍යාඝ ගිණි දරණ යකු අතට පටළවා සළිත 

සළිත මාගේ පාපිට ගැසෙත්වා ගැසෙත්වා.


ඔය ඇති , 
වැඩිය දෙන්නත් හොඳනෑනේ මේවා මේ පරම්පරාවේ සාස්තර .

 අනිත් එක තමයි වශියෙන් ඇතිවෙන්නේ ඇත්ත ආදරයක් නෙවෙයි ඇ . ඕවා කරලා බැලුව වගේ නෙවෙයි ගලව ගන්න විදිහ මං තාම දන්නේ නෑ 

මැදියම් රැයේ හමුවූ බෝදිලමා ( සාමන්‍යයෙන් ඔබ්බට ගිය සිදුවීම් දාමය )

                   
                          


                                   කඳුකරයට හිරු නැඟ එන්නේ අනිත් පළාත් වලට වඩා බොහෝ ප්‍රමාද වීමෙන් සේම,  හිරු අනිත් පලාත්වලටත් කලියෙන්  බැසයාමද සාමාන්‍යය දෙයකි . 

                    ගම්පොල නාවලපිටිය පරන පාරේ පිහිටියාවු  දියුනුවේ මං පෙත් හෙළි පෙහෙලි නොවූ කුරුඳුවත්ත ග්‍රාමයට  මෙම කාලගුණික විපර්්‍යාසය අනිත් පලාත් වලට වඩා තදින් දැනෙන්නේ  සිව් දෙසින්ම කඳුවලින් වටවී  ඇති නිසා විය යුතුය . 

                                                යම් තරමක හෝ වත්කමක් ඇති මිනිසුන් එහි වී නම් , ඒ  අතේ ඇඟිලි වලටත් වඩා අඩුවූ ප්‍රමාණයකි . අනිත් පිරිස යැපුනේ අතමිට ඇතියවුන්ගේ බැලමෙහෙයෙන් ලැබෙන කුලියෙනි . එයද බොහෝ අවස්ථාවල රුපියල් දෙසීයය නොඉක්මවයි . එදිනදා ජීවතය ගැටගසා ගන්නා ආකාරයට අමතරව සිතන්නට යමක් ඔවුන්ට නොවීය .

                                      සිව් දෙසින් කඳු වලලු වලින් ගිලගත්තාවූත් . හාත්පස, කඳුකර වනාන්තර වලටම ආවේනික ලක්ෂණයන්ගෙන් යුතු වනාන්තරත් ,  අතරින් පරත සොහොනක කොත්  හෝ සුදු පැහැයෙන් ඳඟලන්නාවූ ගොක් කොල වලින් යුතු පස්ගොඩැලි අතර ,  තෙරක් නොපෙනෙන තේ වතු වලිනුත් ගැමියන්ගේ ජීවිත තවත් හුදකළා කලා පමනක් නොව මුලු ගම්මානයටම අමුතුම ගුප්ත බවක් එක්කර තිබිනි . 

                                            හොඳින් හඳ එලිය  ඇති රැයක හැරුනුකොට අන් කිසිඳු දිනක රාත්‍රියේදී ගැමියන්  නිවසින් එලියට බසින්නේනම් ඒ  බොහෝ කලාතුරකිනි . පරිසරය ගිල ගත් සීතල සේම , අඳුරු ගුප්ත බවින්ද මැඩවුන ඔවුන් නිවස තුලම ගුලිවි සිටිති . 

                                       සවස් කාලය එලඹෙත්ම , නිවස වටා ඇති සියළු කොළ රොඩු අතුගෑවීයන පරිදිමුලු ගෙපැලටම ආච්චි අම්මාගේ ඉදල් පහස ලැබෙන්නේ  රාත්‍රියේ ගොදු‍රු සොයා එලියට ඇදෙන්නාවූ සර්පයන් උණුසුම සොයා ඒ කොළ රොඩු තුල ගුලිවී සිටීමට ප්‍රිය තාවයක් දක්වන නිසාය . 

                                    ගම්මානයම වැහිබර අඳුරකින් ගිල්වමින් හාත්පස අඳුරුවී ගිය තවත් එක්  සන්ද්‍යාවකි . බටහිර අහස ගුගුරුවමින් නැග එන හෙනහඩ මාහා කුනාටුවක පෙරනිමිති පලකරමින් තිබිනි .ආච්චි අම්මා මිදුල අතුගා ගෙට ඇතුලු වූවා පමණි . මා ඇගේ ඇකයට   පැනගත්තේ මව් සෙනෙහස නොඅඩුව ඒ තුලද ගැබ්වී තිබුනු නියාවෙනි.
                                         ඉකිබිති  හටගත්තේ අති බිහිසුනු කුණාටුවකි .. සැඩ සුළඟින් කැඩී ඉරී විසිරී සීසීකඩ ගිය වැහි වලාකුළු බටහිර අහස වටකොට පැතිරුනේ ආක්‍රමණයකට මුලපුරන්නාවූ සතුරන්ට විරුද්ධව පෙළගැසේනා ගුරුළු රෑනක තරම් චන්ඩ විලාසයෙනි.හදිසියේ පුපු‍රා ගිය කස පහරින් අවදිවූ අසුන් රෑනක් වෙන් ඇඹරෙමින් දිව ආ සුළඟ , සතර අතින්ම බටහිර වා ගැබ පෙලන්නට විය .

                                          තැනින් තැන එබෙමින් සිටි හිරුමඩල පිළඹඳ ආරංචියක් පවා සොයාගත නොහැකි තරම්ය . යම රජුනිගේ අණින් අවදිවූ කුළු මී රැලක තරමට නපුරුවූ දළ රළගෙඩි , දුටුවන් භීතියෙන් උමතු කරවන තරම් විය .
                    බියකරු හඩක් නගාගෙන හිසට ඉහලින් හෙනයක් පිපිරිණි . ඊළඟට ඈත නිම් වලල්ලම දම් පැහැගන්වමින් විදුලි කොටන්නට වූයේ හාත්පස පැවති අඳුර සේම අහසද පුපුරවා දෙබෑ කරන්නට වන තරමිනි..
හොරා යන්ත්‍රයේ  පහේ කනිසම ඉක්මවූවා පමණි . නමුත් හාත්පස වූ  අදුර නිසා පරිසරය අපැහැදිලිවී ඇත. 
                                         පැයකට පමණ පසු වර්ශාව එසේම පැවතුනත් විදුලි කෙටීමේ යම් අඩුවක් විය . නමුත් ඒ අඩුව පිරවෙන්නට ගියේ සුලු මොහොතකි . මුළුමහත් වා තලයම හීන් කෙඳිරිලි හඩකින් පිරි යන්නට විය . එය කෙමෙන් කෙමෙන් වැඩිවී වේදනාවෙන් මුරගාමින් දඟලන්නාවූ  ගැහැනිය‍කගේ හඬට සමාන විය . උදව් ඉල්ලමින් දිගින් දිගටම ඇය වේදනාවෙන් මොර දෙන්නට වූ අතර ඇඟ හිරිවැටී සිටි මගේ කුතුහලයද ඒත් සමඟම වැඩිවිය . 

" කවුද ආච්චි අම්මි ඒ !!!! "
" කටවහගෙන ඉන්ට පුතා " ආච්චි අම්මා එසේ පැවසූයේ වෙද සීයා දෙසද බලමිනි .
                   වෙද සීයා යනු  ආච්චි අම්මාගේ තාත්තාය . ඔහු සිය පුටුවෙන් නැගිට බුදු කුටිය වෙත යනු දකින්නට ලැබුනි. වේදනාවෙන් කෑගසන හඬ දැන් ඇසෙන්නේ අපේ මිදුලෙනි . 
                                            දෙවරක් නෙසිතූ මා මුලින්ම කලේ ආච්චි අම්මා අහක බලන තුරු හිඳ  වසා තිබු දොර පලු විවිර කිරීමයි .......
                                            මිදුලේ පෙරලෙමින් ඳඟලමින් තිබූ කළු පොට්ටනියකි .අඳුරට ඇස හුරුවත්ම එය කාන්තාරුවකට සමාන වුවත් අසාමාන්‍ය විරූපී ස්වභාවයක් ඒ රූපය තුල ගැබ්වී තිබුන බව  වැටහෙන්නටත් ඒ සමඟම හටගත්  ආගන්තුක බියකින් සිත පිරීයාමටත් ගතවූයේ තත්පර කීපයකි . ඇය නැඟූ හඬ දෙසවන් බිහිරිකරන තරම්ය .වේදනාවෙන් යමක් ඉල්ලමින් මා දෙසට වේගයෙන් ඇදෙන රූපය දෙස බලාසිටිනවා විනා කරන්නට කිසිවක් මා සිත්හී හට නොගතී . පලා යාමට අවැසි වුවත් දෙපා ඊට අවනත නැත . කල හැක්කේ බලාසිටීම පමණයි . 
                                       ලිපේ අළු ඉවත් කිරීම වෙනුවෙන් තබාතිබූ ඉලපතද රැගත් ආච්චි අම්මා අප අතරට කඩා වැදුනේ විරූපී රුවත් මාත් අතර වූ පරතරය අඩි කීපයක් වී තිබියදීය. 
                                             එකවරම නැවතුන කලු ‍ගුලිය ආපස්සට පෙරලෙන්නට වූයේ වෙද සීයා ගේ යම් මැතිරිලි හඬක්ද ගුවනට මුසුවී තිබුන අතරය . කෑගැසීම දැන් නැත . ඇත්තේ වැහිබිරුමත් ඉඳහිට ඇසෙන ගෙරවිලි හඞත්  පමණකි . ආපසු හැරුනු ආච්චි අම්මි මා වැළඳගෙන වඩාගෙ යද්දී වෙද සීයා පසුපසින් පැමිණ රිදෙන්න ටොක්කක් ඇනීමටද අමතක නොකලේය.  බෝදිලිමා නොහොත් සොඳරී අවතාරය මූණටම මුනගැසුන පළමු අවස්ථාව එය විය .....
                                          මීට වසර පහලොවකට පමණ සිදුවූ ඒ සිදුවීම් දාමය යලිත් වතාවක් මා සිත තුල හොල්මන් කරන්නට වූයේ හාත්පස ගුගුරමින් යලිත් වතාවක් පහලොස් වසරකට පසුව ඒ මූසල වේදනාබර හඬ  අපඉදිකල කූඩාරම අබිමුවෙන් ඇසෙන්නට වූ නියාවෙනි .   
                                          නමුත් ඒ ගම්පොල හෝ අපේ ගම නොවේ , උදව් ඉල්ලන්නට හෝ  තත්පරෙන් තත්පරය අපවෙත ලංවෙමින් ඇසෙන ‍බොදිලිමාගෙන් අප ගලවාගන්නට කාන්තාවක්ද අප අතර නැත ......... තවත් තත්පර කීපයකින් ඌ අපේ කූඩාරම ඉදිරියේ දෘශ්‍යමාන වනු ඇත ................

බොදිලිමාගේ හමුවීම 02 බලාපොරොත්තු වන්න .